Welcome to ContactPakistan.com
 

نعت رسول
شاعر: محسن علوی جدہ سعودی عرب

(بہ ردیف بیکراں)
 
رحمت اللعالمیں وہ ان  کی رحمت بیکراں
وہ  شفیع المذنبیں ان کی شفاعت بیکراں

ان کی رحمت کو سمو لیں حرف ممکن ہی نہیں
حرف سب محدود اور دامانِ رحمت بیکراں

صدق بھی ایسا کہ ڈھونڈے سے نہ مل پائے مثال
جائیں صدقے کہ ہے خود ان کی صداقت بیکراں

قلب جتنے بھی نبی  کے عشق سے روشن ہوئے
روشنی حد نظر ان کی بدولت بیکراں

عظمت انسانیت میں وصف سب سے منفرد
صاحبِ معراج  کو حاصل ہے رفعت بیکراں

خون کے آنسو رلادیتا تھا دوری کا خیال
پھوٹ کر رویا شجر یہ ہے محبت بیکراں
سنگریزوں میں مجال گفتگو ممکن نہیں
ہاں مگر مل جل کے دی سب نے شہادت بیکراں

نور پھیلا اس طرح شمس الضحیٰ بدر الدجٰی
نور کی کرنوں نے پائی اوج و عظمت بیکراں

ذکر رب العالمیں کرتے رہے وہ بے حساب
گویا سب اذکار میں ان کی تھی قدرت بیکراں

ہائے وہ ان کی حضوری پیش رب العالمیں
وائے رے وہ جذب وہ رب سے محبت بیکراں

اک اشارے میں قمر دونیم ہوکر رہ گیا
یہ کنایت بے کراں ہے یہ اشارت بیکراں

ہائے وہ شیریں بیانی ہائے وہ حسن کلام
آپ کی ہر بات میں ٹہری حلاوت بیکراں

حاضری بھی ہے ریاض الجنۃ کی تسکین روح
قلب مضطر کو ملی آخر سکونت بے کراں

جو تھے مکہ اور مدینہ آج وہ حرمین ہیں
ان کی نسبت سے ملی ہے اِن کو حرمت بیکراں

رب کی جانب سے اشارہ ہے تبھی کرتا ہوں میں
پیروی حسان کی، ہے جن کی شہرت بیکراں

احمد و حامد محمد  صادق و اکمل  امیں
آپ سے پائی ہے ہر ایماں نے قوت بیکراں

ہم نبی کے عشق میں غرقاب ہوجائیں تو پھر
خود بہ خود ہم کو ملے گی ان سے نسبت بیکراں

کاش مل جائے مجھے محسن شفاعت اس طرح
سب کہیں واللہ کیا پائی ہے قسمت بیکراں

 


Learn CPR

Register in our Virtual Blood Bank (Only KSA)

Click to send your Classified ads

KSA Newsletter Archives - Read all about our community in KSA
Be United - Join the Community
©Copyright notice