پاکستان انٹرنیشنل اسکول کی طالبات دلکش اور دیدہ زیب لباس میں ملبوس اسٹیج پر آئیں اور ’’میں نے تمہاری گاگرسے‘‘،’’ڈھولک بجے گی ساری رات‘‘ اور مشہور پنجابی لوک گیت ’’ بلے بلے نی ٹور پنجابن دی‘‘ پر خوبصورت رقص پیش کیا۔اس دوران عرب اور دیگر ممالک کی خواتین مسلسل تالیاں بجا کر پاکستانی طالبات کوداد و تحسین سے نوازتی رہیں۔پاکستانی ملبوسات کو جو پذیرائی ملی وہ انتہائی خوش آئندہے۔ اس شو میں پاکستان
 انٹر نیشنل اسکول ہی کی طالبہ علینا حسن نے اپنی خوبصورت آواز میں مشہور فلم ’’ٹائیٹینک‘‘ کا نغمہ ’’My heart will go on‘‘ گا کر حاضرین کے دل موہ لئے۔اس آئٹم میں پاکستانی ملبوسات اورثقافت کے حوالے سے طالبات کی کارکردگی کو بے حد سراہا گیا ۔
اس میں کوئی شک نہیں کہ پاکستان اور سعودی عرب کے مابین گہرے قلبی اور برادرانہ تعلقات استوار ہیں۔ ایسی ثقافتی تقریبات دونوں ممالک کے عوام میں پائے جانے والے روابط کو مزید مستحکم کرتی ہیں اور ایک دوسرے کے ثقافتی تنوع کے بارے میں جاننے کا موقع فراہم کرتی ہیں۔

دارالحکمہ کالج میں پی آئی ایس جی، ای ایس کی طالبات اور پرنسپل کو ایک استقبالیے اور سابق وزیر و رکن پارلیمنٹ شاہد ملک کے لیکچر کے لئے بھی مدعو کیاگیا تھا۔ اس پلیٹ فارم سے طالب علموں کو تبادلۂ خیال کرنے اور اپنی آراء پیش کرنے کا موقع بھی ملا۔

اس میں کوئی شک نہیں کہ پاکستان ا نٹرنیشنل اسکول، انگلش سیکشن سعودی عرب میں پاکستان کی ایک مضبوط شناخت بن کر ابھرا ہے۔ یہ مادر علمی ا پنے طالبعلموں کو صلاحیتوں کے اظہار اور علم میں اضافے کے بھر پور مواقع فراہم کرتی ہے۔