               |
| حمد رب ذوالجلال | | شاعر: محسن علوی جدہ سعودی عرب | |
تو حرف حمد کو ایسے سنوار آنکھوں سے
جہانِ حمد میں آئے بہار آنکھوں سے
در خدا پہ نظر ایسے جذب میں آئے
لکھوں میں حمد کا اک شاہکار آنکھوں سے
میں رب ترے لئے لکھوں تمام حمد تری
تری صفات کا کیا ہو شمار آنکھوں سے
لبوں پہ آئے دعا مستجاب ہو جائے
تو رب کو عشق میں ایسے پکار آنکھوں سے
جو اشک ہوں وہ انہیں حمد میں شمار کرے
بہیں جو رب کی محبت شعار آنکھوں سے
تمام عمر خدا تیرے ذکر میں گزرے
اتر نہ پائے یہ تیر ا خمار آنکھوں سے
کسی بھی وقت میں رب کو نہ بھولنے پائے
تو رب کو قلب میں ایسے اتار آنکھوں سے
تجھے تمام گناہوں سے مغفرت مل جائے
ندامتوں کو تو اتنا ابھار آنکھوں سے
جو رب کو قرب میں پاؤں تو جانے کیوں محسن
اسی کے عشق کا بہتا ہے پیار آنکھوں سے
|
|
